ଫଗୁନ୍

ଫଗୁନ୍ ଆନିଚେ ରଙ୍ଗ୍ ପସରା
ତାର୍ ସଙ୍ଗେ ହୁଲି ଖେଲ୍
ଦୁଖ୍ ସୁଖ୍ ସବୁ ବାଆଁଟି ନେମା
ହେଇ ସଭେ ଆମେ ମେଲ୍ ।

ଫଲସା ଫୁଲ୍ ହଁସେ ମୁଲ୍‌ମୁଲ୍,
ଲାଲ୍ ଗଲଗଲ୍ ହେଇ,
ନୁଆଁ ଭୁଆସେନ୍ ଉଢନା ତଲେ,
ହଁସୁଥିସି ଖଲ୍ ଖଲେଇ ।

ବାଦଲ୍ ଭିତରେ ସୁରୁଜ୍ ରଜା
ଖେଲୁଛେ ଲୁକ୍ ଲୁକାନି ,
ଗରମ୍ ଥି ତତେଇ ଦେସି ଫେର୍
ଶୀତଲ୍ ଖରା ଦେସି ବୁନି ।

ହୁର୍ ହୁରିଆ ବଉଲିଆ ଧୁକା
ତାର୍ ସଙ୍ଗେ ଖରାର୍ ଦାନ୍ଦି,
ଘାଏ ହେସି ମନ୍ ଉସତ୍ ଫେର୍
ମନ୍ ପକାସି କାନ୍ଦି ।

ତନ୍ମୟବାଳା ମିଶ୍ର
ବୀରମହାରାଜପୁର , ସୁବର୍ଣ୍ଣପୁର