ମୁକ୍ତା

ଆନ୍ତରିକ ଭକ୍ତି ନାହିଁ ଯଦି

ଖୋଜିଲେ ପାଇବା କେଉଁଠୁ ?

ଅବଶ୍ୟ ଇଚ୍ଛା ଓ ଇଚ୍ଛା ମଧ୍ୟରେ

ରହିଛି ପାର୍ଥକ୍ୟ ବୋଲି

ତୃଷ୍ନା,କାମନା,ବୁଦ୍ଧି,ଶାସ୍ତ୍ର ଓ ମୂର୍ତ୍ତିକୁ ନେଇ

ଚାଲିଛି ସଂଘର୍ଷ,

ଛାଟିପିଟି ହେଲେବି

ମନରେ ବିଶ୍ୱାସ ଜମୁନି

“ବାୟୁ ଏକ ପ୍ରଶ୍ୱାସ ମାତ୍ର”।

ଅଭିବ୍ୟକ୍ତିର କାର୍ଯ୍ୟ କ’ଣ 

ପଚାରିଲେ କହିବାକି?

ମାଂସପେଶୀର ଶକ୍ତି ଆମ କାର୍ଯ୍ୟ ।

ମସ୍ତିଷ୍କର ଉଚ୍ଚ ବିଚାରରେ

ଶ୍ରବଣ କରିବା ଓ ହୃଦୟ ମସ୍ତିଷ୍କ ଜିଣି

ଶରୀରର ଶିରା ପ୍ରଶିରା ଓ ପ୍ରତିଟି ରକ୍ତ ବିନ୍ଦୁରେ

ମିଶିଲେତ

ଶରୀର ରନ୍ଧ୍ର ଖୋଜିବା । 

 ବିଚାରର କାଠଗଡାରେ

ଠିଆ ହୋଇ କାହିଁକି ଚିତ୍କାର ଜାଣି ହେଉନି

ଏଠାରୁ ଟିକିଏ ସେଠାରୁ ଟିକିଏ ନେଇ

ମୂହୁର୍ତ୍ତକ ଉତ୍ତେଜିତ ସ୍ନାୟୁ

ସେତିକିରେ ଶେଷକି ଜାଣିବି ହୁଏନା ।

ଅବଶ୍ୟ ମାନିବାକୁ ହେବ

ଅନ୍ତଃକରଣର ପରିପୂର୍ଣ୍ଣତା ଭିତରୁ

ମୁହଁର ଭାଷା ଉଚ୍ଚାରିତ ନହେଲେ

ପରିପୂର୍ଣ୍ଣତାର ହାତ କ’ଣ ବୁଲିପାରେ !

ଠିକ ଅଛି

ସ୍ୱାତୀ ନକ୍ଷତ୍ରର ଆରୋହଣ ବର୍ଷାକୁ

ଅପେକ୍ଷା କରିବା

ବିନ୍ଦୁଟିଏ ପଡିଲେତ 

ଶାମୁକା ଭିତରୁ ମୁକ୍ତା ଖୋଜିବା ।

ଅବଶ୍ୟ ଖୋଜିଲେ ପାଇବା

‘ମାଗ,ଏବଂ ଏହା ତୁମକୁ ଦିଆଯିବ,

ଖୋଜ, ପାଇଯିବ

କବାଟ ଉପରେ ଠକ୍ ଠକ୍ କର

କବାଟ ଖୋଲିବ

ଏହା କ’ଣ ଶିଖାଇବାକୁ ହେବ ?

କେବଳ

ଇଚ୍ଛା ଓ ଇଚ୍ଛା ମଧ୍ୟରେ ରହିଥିବା ପାର୍ଥକ୍ୟକୁ

ଏବେ ବୁଝିବାକୁ ହେବ ।

ଡା.ରାଜାରାମ ଷଡଙ୍ଗୀ