ତ୍ରିରଙ୍ଗା ତଳରେ ଦେଶବାସୀ ଭିଡ଼
ଶୁଭେ ଜନ ଗଣ ମନ,
ସଭିଙ୍କ ମନରେ ଉଠେ ପ୍ରଶ୍ନବାଚୀ
ସତେକି ଆମେ ସ୍ବାଧୀନ…?
ମତଦାତା ଏଠି ମତଦାନ କରି
ବାଛୁଛି ଯାହାକୁ ମୁଖିଆ,
ସମ୍ପର୍କ ନୀତିରେ ସିଏ ବାଟବଣା
ଦେଖୁଅଛି ଏକ ପାଖିଆ ।
କାଗଜରେ ଲେଖା ନୀତି ଧାଡ଼ି ଧାଡ଼ି
ସବୁ ହୁଏ ନାହିଁ ପାଳନ,
ପାଳନ କରିଲେ କାଳେ ଚଉକିଟା
ଚାଲିଯିବ ହାତୁଁ ମେଲଣ ।
ଅପରାଧୀ ପାଇଁ ଯେଉଁଠି ଓକିଲ
ଯୁକ୍ତି ପାଇଁ ଅଣ୍ଟା ଭିଡୁଛି,
ନ୍ୟାୟ ନିକିତି ଟା ଉପରୁ ତଳକୁ
ଦୋହଲି ଦୋହଲି ଛିଡୁଛି ।
ବାଘ, ଭାଲୁ ଠାରୁ ମଣିଷ ଟା ଏଠି
ମଣିଷ କୁ ଭାରି ଡରୁଛି,
ରକ୍ଷକ ଟା ଆଜି ଭକ୍ଷକ ସାଜିଛି
ତଣ୍ଟି ଚିପି ତାକୁ ମାରୁଛି ।
ସତ କହିଦେଲେ ମିଛ ମାୟା ଜାଲେ
ହାଜତରେ ସିଏ ସଢୁଛି,
ସ୍ବାଧୀନତା ଆଜି ପଞ୍ଜୁରୀ ଭିତରେ
ଅନ୍ୟର ଦୟାରେ ବଢୁଛି ।
ଆମେ କ’ଣ ସ୍ବାଧୀନ….?
