ଶରାବନର୍ ପାଏନ୍ ଉହୁଲି ଯାଏସି
ହେଇଥିଲେଁ ଶୁଖା ଭଠା
ଅଛ୍ରେ ପାଏନ୍ ଭି କାଫି ଆଏ ବୁଆ
ଥିବା ଯଦି ବଂଧ୍ କଁଟା ।
କେତେ ଅଁଟାବୁ ଯେ ଅଁଟା ॥
ଶିଖ୍ବାକେ ମନ୍ ଛିନ୍ବାକେ ଖୁରି
ମେଲା ରଖିଥିଲେଁ ସିନେ
ହରେକ୍ ନିମ୍ଷେଁ ଜ୍ଞାନ୍ ଥିପୁଥିସି
ଈ ବିଶ୍ବର୍ କନେଁ କନେଁ ।
ଶିଖ୍ବାକେ ଥିଲେଁ ମନେ॥
ମୁଇଁ ନ ଜାନିଛେଁ ବଲୁଥିସି ଯେଏ
ନାଇଁ ଶିଖିପାରେ କିଛି
ମହା ବିଜ୍ଞାନୀ ହେଇକରି କିଏ
ବଲ୍ସି ‘ନୁହେ ପାଏଁ କିଛି
କେତ୍ନି କେତେ ଅଛେ ବାକି ॥
ମୁକ୍ତକଂଠ ପ୍ରଧାନ
ସମ୍ବଲପୁର
