ଖଜା

ବଢେ ଆଧିକର୍,    ଦରବ୍ ଗୁଟ୍’କ, 

       ନାଆଁ ଟାକ ତାର୍ ଖଜା,

ରଜା ନୁ ପର୍’ଜା ,    ସବ୍’କର୍ ମନେ,

        ତାହାର୍ ଦର୍’ଜା ଉଁଚା ।

ଶାଶ୍ ଘର୍ ଖଟି,  ଗଲେ ସୁନା ନାକି

       ସଁଗେ ତ ଯାଏସି ଧରି ,

ଅଏର୍’ସା ,ମୁଗିଆ,  ଦାଁତ୍’ରି ଖଜା , 

      ଚଂଘ୍’ରା ଭୁଗ୍’ଲି ଭରି  ।

ଯାତ୍’ରା ଦେଖା ଟା, ବନେ ଲାଗ୍’ସି କେଁ

      ଖଜା ନାଇଁ ଦେଲେ ଘିନି ,

ହାଟ ର୍ ଦିନ୍ କେ, ମନ୍ ଯୁଗି ଥିସି,

       ବା’ ଦେବା ବଲି ଆନି  ।   

 ଲଗନ୍ ଧରା ନୁ     ପିନ୍ଧାନି, ବିହା,

      ଝିଇ ଲେଉଟେନ୍ ଭାରେଁ ।

ବନ୍ଧୁ ର୍ ଭାବ୍ ଥି,  ସୁଆଦ୍ ଭରି

       ବନ୍ଧନ୍ ମଧୁର୍ କରେ ।

 ତିହାର୍’ ବାହାର୍,  ଚାଲି ଚଲ୍’ନି ର୍,

        ମାନ୍ ତ ବଢଉ ଥାଉ, 

ରଜା ପର୍’ଜା,     ସବ୍’କର୍ ଲାଗି,

       ଆଧିକର୍ ହେଇ ରହୁ ।

Sibani Padhi 

 Balikulunda, Bargarh